20 Yanvar faciəsinin 35-ci ildönümü qeyd edilir
Agah.az xəbər verir ki, 1990-cı il yanvarın 20-də baş vermiş faciədən 35 il ötür. Hər il olduğu kimi, bu gün Azərbaycanda Ümumxalq Hüzn Günü kimi anılır.
1990-cı ilin yanvarın 19-dan 20-nə keçən gecə SSRİ rəhbərliyi tərəfindən verilən əmr əsasında Sovet ordusunun qoşun hissələri Bakıya və Azərbaycanın digər bölgələrinə yeridilib. Dinc əhaliyə qarşı ağır texnika və müxtəlif silahlardan istifadə edilib, nəticədə 150 nəfər şəhid olub, 744 nəfər yaralanıb, 841 nəfər qanunsuz olaraq həbs edilib.
Faciənin başlanğıcı 1987-ci ildən bəri Ermənistan tərəfindən azərbaycanlıların tarixi torpaqlarından deportasiyası və Qarabağın Ermənistana birləşdirilməsi cəhdləri ilə əlaqədar gərginliyin artması idi. Sovet rəhbərliyi isə vəziyyəti həll etmək əvəzinə, Azərbaycan xalqına qarşı bu dəhşətli cinayəti törədib.
29 mart 1994-cü ildə ümummilli lider Heydər Əliyevin təşəbbüsü ilə Milli Məclis tərəfindən 20 Yanvar faciəsi ilə bağlı xüsusi qərar qəbul olunub.
Bu gün Şəhidlər xiyabanında faciə qurbanlarının xatirəsi anılacaq. Diplomatik korpus nümayəndələri və sadə vətəndaşlar şəhidlərin məzarlarını ziyarət edəcəklər. Eyni zamanda, Azərbaycanın xaricdəki səfirlikləri və icmaları tərəfindən Qanlı Yanvar faciəsinə dair tədbirlər təşkil olunacaq.
Saat 12:00-da şəhidlərin xatirəsi bir dəqiqəlik sükutla yad ediləcək, ölkədə avtomobil, gəmi və qatarlar səs siqnalları verəcək, dövlət bayraqları endiriləcək.
Açar sözlər: 20 Yanvar faciəsi, Ümumxalq Hüzn Günü, Şəhidlər xiyabanı, Qanlı Yanvar hadisələri, Sovet ordusunun hücumu.
(055) 436-46-45
