İmkanlı şəxsləri intim görüntüləri ilə şantaj edənlərin yenidən məhkəməsi olub
Agah.az xəbər verir ki, Şamaxıda vətəndaşı zor tətbiq edərək külli miqdarda pul tələb etməkdə təqsirləndirilən Dünyamalı Şahbazov və onunla birlikdə həbs edilən Elnarə Əzimzadənin barəsindəki kassasiya şikayəti üzrə Ali Məhkəmədə keçiriləcək ilkin hazırlıq prosesi oktyabrın 18-nə təyin olunub. Məhkəmə işi hakim Teyyub Muxtarovun sədrliyi ilə araşdırılacaq.
İttihama görə, Rusiya vətəndaşı olan Dünyamalı Şahbazov, Şamaxının Şəhriyar qəsəbəsində şəxsiyyəti məlum olmayan iki nəfərlə birlikdə Nazir Nübarinin yaşadığı evin həyətinə gəlib və zor tətbiq edərək onu avtomobilə mindirib. Daha sonra qəsəbədəki Bayraq meydanı adlanan əraziyə apararaq Nazir Nübarini döyüb və ondan 60 min manat tələb ediblər.
Aparılan əməliyyat-axtarış tədbirləri nəticəsində Dünyamalı Şahbazov şübhəli şəxs qismində saxlanılıb. İstintaq tərəfindən ona qarşı Cinayət Məcəlləsinin 182.2.3-cü maddəsi (hədə-qorxu ilə tələb etmə, külli miqdarda əmlak əldə etmək məqsədi ilə törədildikdə) üzrə ittiham irəli sürülüb. Bu işdə Nazir Nübarinin xanımı da zərərçəkmiş kimi tanınıb.
İddialara görə, Dünyamalı Şahbazovun Bəxtiyar Həsənzadənin intiharında da rolu olub. Məlumata əsasən, Dünyamalı Şahbazov Bəxtiyar Həsənzadədən 100 min manat borc tələb edib. Bəxtiyar Həsənzadə 30 min manatı qaytarsa da, qalan 70 min manatı ödəyə bilməyib və intihar edib. İstintaqın versiyasına görə, Dünyamalı Şahbazov şəxsləri intim görüntülərlə şantaj edərək vəzifəli şəxslərdən pul tələb edirmiş.
Bakı Ağır Cinayətlər Məhkəməsinin qərarına əsasən, Dünyamalı Şahbazov 13 il 2 ay, Elnarə Əzimzadə isə 11 il 6 ay müddətinə azadlıqdan məhrum edilib.
Açar cümlələr: Şamaxıda zorakılıq və pul tələb etmə, məhkəmə prosesi, Dünyamalı Şahbazov, Elnarə Əzimzadə, şantaj və zorakılıq işləri.
(055) 436-46-45
