Bakıda Dəhşətli Qətl: 16 Yaşlı Gənc Anasını Xüsusi Amansızlıqla Öldürüb

Dostuna göndər xəbərdən agah olsun:

Agah.az xəbər verir ki, 2023-cü il fevralın 10-da səhər saat 8 radələrində Bakının Xətai rayonunda 46 yaşlı Solmaz Mansurova qətlə yetirilib. Hadisə Sarayevo küçəsindəki mənzildə baş verib. Hadisə yerində olan 16 yaşlı Ziya Mansurov, mətbəx bıçağı ilə anasını öldürdüyünü etiraf edib.

Xətai Rayon Prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanıb. Məhkəmə-tibbi ekspertizanın rəyinə əsasən, Solmaz Mansurovanın bədənində 195 bıçaq yarası aşkarlanıb və onun ölüm səbəbi kəskin qanitirmə olub.

İstintaq nəticəsində müəyyən edilib ki, Ziya anasını daim şərəf və ləyaqətini alçaltdığına görə öldürmək qərarına gəlib. Fevralın 10-da səhər saat 6-da o, mətbəx bıçağını götürərək, anasına çoxsaylı zərbələr endirib. Solmaz Mansurova müqavimət göstərərək digər otağa qaçmağa çalışsa da, Ziya onu tutaraq bacılarının gözləri önündə qətlə yetirib.

İş üzrə dindirilən Ziya bildirib ki, uşaqlıqdan anası tərəfindən pis rəftara məruz qalıb və bu səbəbdən əsəblərini idarə edə bilməyib. Fevralın 9-da atası gecə növbəsinə getdikdən sonra cinayəti planlaşdırmağa başlayıb və səhər saatlarında anasını öldürüb.

Məhkəmədə Ziya Mansurov özünü təqsirli bilib və peşman olduğunu bildirib. Prokuror onun üçün 11 il cəza istəyib. Bakı Ağır Cinayətlər Məhkəməsi, Ziyanın yetkinlik yaşına çatmamasını nəzərə alaraq, onu 10 il müddətinə azadlıqdan məhrum edib. Cəza ümumi rejimli tərbiyə müəssisəsində çəkiləcək.