İran Avropa ilə nüvə danışıqlarını mənasız hesab edir – Rəsmi açıqlama

Agah.az xəbər verir ki, İran İslam Respublikasının xarici işlər naziri Abbas Əraqçi Avropa İttifaqı və Böyük Britaniyanın İranla nüvə proqramı üzrə gələcək danışıqlarda iştirakını “mənasız və əhəmiyyətsiz” adlandırıb.

Nazir bildirib ki, əgər Birgə Hərtərəfli Fəaliyyət Planı (JCPoA) üzrə komissiyanın koordinatoru – Aİ diplomatiyasının yeni rəhbəri Kaya Kallas “danışıqların məqsədi İranın nüvə proqramının tam dayandırılmasıdır” deyə düşünürsə, bu, Avropanın prosesdə iştirakını əhəmiyyətsiz edir.

Əraqçi qeyd edib:

“Əgər Kallasın mövqeyi bu şəkildə davam edərsə, o zaman nə Nüvə Silahlarının Yayılmaması Müqaviləsinin müddəaları, nə də BMT Təhlükəsizlik Şurasının 2231 saylı qətnaməsi Avropa üçün önəmli deyil. Bu isə danışıqların hüquqi və siyasi əsaslarını şübhə altına alır”.

Xatırladaq ki, Kaya Kallas bu yaxınlarda İranın nüvə proqramının “tamamilə dayandırılması” məqsədilə danışıqların təcili bərpasını vacib saydığını bildirib. Tehran bu mövqeni öz suverenliyinə və beynəlxalq öhdəliklərinə zidd hesab edir.