Əməliyyat zamanı canlı yayım edən həkimlərə XƏBƏRDARLIQ

Agah.az xəbər verir ki, əməliyyat zamanı çəkiliş və canlı yayım edən həkimlərə qarşı ciddi xəbərdarlıq edilib. Bu barədə Səhiyyə Nazirliyi Analitik Ekspertiza Mərkəzi məlumat yayıb.

Mərkəzin açıqlamasına əsasən, əhalinin sağlamlığına təhlükə yaradacaq hallar aşkarlandıqda məsələ hərtərəfli araşdırılır və qanun pozuntuları müəyyən edilərsə, plandankənar yoxlamalar keçirilir.

Qaydalarla bildirilib ki, əməliyyat zamanı çəkiliş yalnız elmi-tədris məqsədilə və sanitar-gigiyenik normalara tam uyğun olaraq aparıla bilər. Yalnız xüsusi sterillik tələblərinə uyğun texniki avadanlıqlardan istifadə edilməsinə icazə verilir. Digər vasitələrlə çəkilişlər infeksiyanın yayılması riskini artırır və gigiyena qaydalarını pozur.

Həkimlərin media çıxışları, forumlardakı iştirakları və maarifləndirmə fəaliyyəti etik normalara uyğun olmalı, reklam və özünüreklam məqsədi daşımamalıdır. Məlumatda vurğulanır ki, həkimlər vəzifəsindən digər hüquqi və fiziki şəxslərin maraqlarını təbliğ etmək üçün istifadə etməməlidirlər.

Qanunvericiliyə əsasən, bu tələbləri pozan və reklam xarakterli fəaliyyət göstərən şəxslər cərimələnə bilər. Belə ki, “Reklam haqqında” Qanunun 29.1-ci maddəsinə və İnzibati Xətalar Məcəlləsinin 428.4-cü maddəsinə əsasən, müvafiq qaydalara əməl etməyən vəzifəli şəxslər 300–500 manat, hüquqi şəxslər isə 1000–2000 manat məbləğində cərimələnə bilər.

Açar sözlər: əməliyyat zamanı çəkiliş, canlı yayım qadağası, həkimlərə xəbərdarlıq, Səhiyyə Nazirliyi, Analitik