Xəzərdə güclü küləklə bağlı gəmilərə XƏBƏRDARLIQ – Dalğalar 6 metrə çata bilər
Agah.az xəbər verir ki, Dövlət Dəniz və Liman Agentliyinin (DDLA) Gəmi Hərəkətinin İdarəedilməsi Mərkəzi Xəzər dənizində hava şəraitinin kəskin dəyişəcəyi ilə bağlı gəmilərə xəbərdarlıq edib.
Məlumata görə, aprelin 15-dən başlayaraq Xəzər Dəniz Akvatoriyasında şimal-qərb küləyinin güclənməsi gözlənilir. Küləkli hava şəraitinin aprelin 17-si gündüz saatlarınadək davam edəcəyi bildirilib.
Proqnoza əsasən, küləyin sürəti 18-23 m/san, bəzi hallarda isə 25-30 m/san-dək artacaq. Eyni zamanda, dənizdə dalğaların hündürlüyü ilkin mərhələdə 2.0-3.0 metr təşkil edəcək, daha sonra isə 4.0-6.0 metrə qədər yüksələcəyi ehtimal olunur.
Qeyd olunan səbəbdən Mərkəz dəniz nəqliyyatı ilə hərəkət edənlərə ehtiyatlı olmalarını və xəbərdarlıq qaydalarına əməl etmələrini tövsiyə edir.
Açar sözlər: Xəzər dənizi, küləkli hava, gəmi hərəkəti xəbərdarlığı, Dövlət Dəniz və Liman Agentliyi, dalğalı dəniz, 6 metr dalğa, DDLA xəbərdarlığı, dənizdə təhlükəli hava.
