FHN Novruz bayramı ilə əlaqədar yanğın təhlükəsizliyinə dair əhaliyə təkrar müraciət edib
Nazirlikdən verilən məlumata görə, Novruz bayramı xalqımızın milli-mənəvi dəyərlərini təcəssüm etdirən bir bayramdır və hər il böyük təntənə ilə qeyd edilir. Lakin bayram mərasimləri, xüsusilə tonqalların yandırılması zamanı yanğın təhlükəsizliyi qaydalarına əməl edilməməsi nəticəsində arzuolunmaz hadisələr baş verir.
Fövqəladə Hallar Nazirliyinin verdiyi məlumata əsasən, bu il keçirilən İlaxır çərşənbə zamanı yanğın təhlükəsizliyi qaydalarına riayət edilməməsi nəticəsində 19 yanğın hadisəsi qeydə alınıb. Nazirlik, xüsusilə küləkli hava şəraiti nəzərə alındıqda, əhaliyə bir daha müraciət edərək, Novruz bayramı mərasimlərində yanğın təhlükəsizliyi qaydalarına riayət etməyə çağırıb.
Müraciətdə vurğulanan əsas qaydalar aşağıdakılardır:
- Bayram tonqalı evlərdən, avtomobillərdən, elektrik naqillərindən, ağaclardan və digər yanıcı əşyalardan uzaqda və təhlükəsizlik tədbirləri görülməklə yandırılmalıdır.
- Tonqal ətrafına yığışan azyaşlılar yalnız böyüklərin nəzarəti altında olmalıdır.
- Tonqal üzərindən atılarkən ehtiyatlı olunmalıdır.
- Tonqal tamamilə sönənədək nəzarətdə saxlanılmalıdır.
- Süfrələrdə yandırılan şamlar nəzarətsiz qalmamalıdır.
Həmçinin, küləkli hava şəraitində tonqal yandırmanın xüsusilə təhlükəli olduğu qeyd edilib. Nazirlik, pirotexniki vasitələrin istifadəsini qadağan edir.
