İlham Əliyev Albaniyanın Prezidenti ilə görüşüb
Agah.az xəbər verir ki, Azərbaycan Prezidenti İlham Əliyev martın 13-də Albaniyanın Prezidenti Bayram Beqay ilə görüşüb.
Görüş zamanı Bayram Beqay, COP29-un Azərbaycanda uğurla keçirilməsi münasibətilə Prezident İlham Əliyevə təbriklərini çatdırıb və tədbir çərçivəsində aparılan danışıqların mühüm nəticələr verdiyini, iqlim gündəliyi ilə bağlı vacib qərarların qəbul olunduğunu vurğulayıb. Beqay, həmçinin Azərbaycan ilə Albaniya arasında siyasi əlaqələrin yanında iqtisadi-ticari, enerji, turizm və digər sahələrdə də əməkdaşlığın uğurla davam etdiyini qeyd edib. O, TAP layihəsinin əhəmiyyətinə və Azərbaycanın Albaniyanın qazlaşdırılması istiqamətindəki layihələrə verdiyi dəstəyə də toxunub.
Azərbaycan Prezidenti İlham Əliyev isə təbriklərə görə təşəkkürünü bildirərək, COP29-a hazırlıq işlərinin yüksək səviyyədə həyata keçirildiyini və bu tədbirin iqlim gündəliyi baxımından əhəmiyyətli qərarların qəbul edilməsinə şərait yaratdığını qeyd edib. Prezident, həmçinin Azərbaycan ilə Albaniya arasında dostluq əlaqələrinin mövcud olduğunu və enerji sahəsində əməkdaşlığın uğurla inkişaf etdiyini vurğulayıb.
Söhbət zamanı əməkdaşlığın gələcək perspektivləri və ikitərəfli münasibətlərə dair məsələlər müzakirə edilib. Həmçinin, XII Qlobal Bakı Forumunun beynəlxalq gündəlikdəki əhəmiyyəti qeyd edilib, Bayram Beqay bu tədbirdə mütəmadi olaraq iştirak etməsini məmnunluqla vurğulayıb.
