Pakistan Azərbaycanla ticarət dövriyyəsini 2 milyard dollara çatdırmağı planlaşdırır
Agah.az xəbər verir ki, Pakistanın Baş naziri Şahbaz Şərif ölkəsinin Ticarət Nazirliyinə Azərbaycanla ticarət dövriyyəsinin 2 milyard dollara çatdırılması üçün hərtərəfli plan hazırlamağı tapşırıb.
Bu qərar martın 4-də Şahbaz Şərifin Azərbaycana son səfərinin nəticələrinə həsr olunmuş hökumət iclasında qəbul edilib. Baş nazir Bakıda imzalanmış anlaşma memorandumları və sazişlərin dərhal icrasını təmin edəcəyini bildirib.
Azərbaycan Prezidentinin Pakistana 2 milyard dollar sərmayə qoymaq niyyəti fonunda, Şahbaz Şərif müavini və xarici işlər naziri İshaq Darın rəhbərliyi ilə komitə yaradıb. Bu komitə enerji və infrastruktur sahələrində sazişlərin hazırlanması ilə məşğul olacaq.
Bundan əlavə, Baş nazir gələn ay Azərbaycan Prezidentinin Pakistana gözlənilən səfərinə hazırlıq işlərinin prioritet qaydada başa çatdırılmasını tapşırıb. O, həmçinin Azərbaycanda və Pakistanla əhəmiyyətli ticarət potensialı olan digər ölkələrdə ticarət nümayəndələrinin təyin edilməsi barədə göstəriş verib.
