İlon Maskın qurumu ABŞ federal ödəniş sisteminə giriş əldə etdi
Agah.az xəbər verir ki, İlon Maskın rəhbərlik etdiyi ABŞ Hökumət Səmərəliliyi İdarəsi (DOGE) ölkənin əsas büdcə ödənişlərinin həyata keçirildiyi federal ödəniş sisteminə giriş imkanı qazanıb. Bu qərar ABŞ Maliyyə Nazirliyində parçalanmaya səbəb olub.
“ABC News” telekanalının məlumatına görə, daha əvvəl bu sistemə yalnız Maliyyə Nazirliyinin məhdud sayda rəsmisi çıxış əldə edə bilirdi, çünki platforma milyonlarla vətəndaş haqqında məxfi məlumatları özündə əks etdirir.
Yeni giriş siyasətinin təsdiqi nəticəsində sistemin əsas kuratorlarından biri Devid Lebrik istefa verib. Nazirlik rəsmiləri DOGE-nin ödəniş sisteminə müdaxiləsinin bəzi əməliyyatların dayandırılmasına və ya ləğvinə səbəb ola biləcəyindən narahatdırlar.
Senatın Maliyyə Komitəsinin üzvü Ron Uayden maliyyə naziri Skott Bessentə ünvanladığı məktubda bu addımı ciddi şəkildə tənqid edib: “Qanuna açıq-aşkar etinasızlıq göstərən şəxslərin bu cür məxfi sistemlərə çıxışının təmin edilməsi üçün heç bir əsas görmürəm.”
Hazırda məsələ ilə bağlı müzakirələr davam edir.
Açar sözlər: İlon Mask DOGE, federal ödəniş sistemi, ABŞ Maliyyə Nazirliyi, məxfi məlumatlar, Devid Lebrik istefası, büdcə ödənişləri, Ron Uayden məktubu
