Rusiyanın “Azimut” aviaşirkəti Azərbaycana uçuşları dayandırdı
Agah.az xəbər verir ki, Rusiyanın “Azimut” aviaşirkəti Mineralnıye Vodı və Soçidən Azərbaycana olan reyslərini ləğv edib. Aviaşirkətin mətbuat xidmətindən verilən məlumata görə, uçuşların dayandırılmasının səbəbi Azərbaycan Dövlət Mülki Aviasiya Agentliyinin uçuş icazəsini geri çəkməsidir.
Ləğv edilən reyslər arasında Mineralnıye Vodı-Bakı, Mineralnıye Vodı-Gəncə və Soçi-Bakı istiqamətləri yer alır.
Bu qərar, dekabrın 25-də Qazaxıstanın Aktau şəhəri yaxınlığında baş verən aviaqəzadan sonra qəbul edilib. AZAL-ın Bakı-Qroznı reysini həyata keçirən sərnişin təyyarəsinin qəzaya uğraması nəticəsində 38 nəfər həlak olub, 29 nəfər isə sağ qalıb. Hadisənin səbəblərini araşdırmaq məqsədilə Prezident İlham Əliyevin tapşırığı ilə Baş nazir Əli Əsədovun rəhbərliyi ilə Dövlət Komissiyası yaradılıb.
Qəzadan sonra dekabrın 26-sı Azərbaycanda matəm günü elan edilib.
Eyni zamanda, bir neçə xarici aviaşirkət də təhlükəsizlik səbəbləri ilə Rusiyaya uçuşlarını dayandırıb. Bunların arasında Qazaxıstanın “Qazaq Air”, İsrailin “El Al” və BƏƏ-nin “Flydubai” aviaşirkətləri yer alır.
Açar sözlər: Azimut aviaşirkəti, Azərbaycana uçuşlar, Mineralnıye Vodı-Bakı, Soçi-Bakı, aviaqəza, Dövlət Komissiyası, İlham Əliyev.
(055) 436-46-45
