Konqoda naməlum xəstəlik: 406 yoluxma, 30-dan çox ölüm
Agah.az xəbər verir ki, Konqo Demokratik Respublikasının Kvanqo əyalətində oktyabrın 24-dən bu yana naməlum xəstəlik səbəbindən 406 nəfər yoluxub, 30-dan çox insan həyatını itirib. Məlumatı Ümumdünya Səhiyyə Təşkilatı (ÜST) yayıb.
Xəstəlik Panzi tibbi-sanitariya zonasında qeydə alınıb. Əsas simptomlara qızdırma, baş ağrısı, burun axması, öskürək və bədən ağrıları daxildir. Xüsusilə ağır hallarda xəstələrdə ciddi zəifləmə müşahidə olunur. Yoluxanların əksəriyyəti beş yaşadək uşaqlardır.
Yağış mövsümünün davam etməsi Panziyə giriş-çıxışı çətinləşdirib, paytaxt Kinşasadan bu bölgəyə yol təxminən 48 saat çəkir. ÜST ekspertləri xəstəliyin səbəblərinin müəyyən edilməsində çətinliklərin olduğunu bildirir. Hazırda bölgədə laboratoriya nümunələri toplanır və xəstələrə tibbi yardım göstərilir.
Ekspertlərin ilkin dəyərləndirməsinə görə, xəstəliyin səbəbi kəskin pnevmoniya, qrip, COVID-19, qızılca və ya malyariya ola bilər. Qidasızlıq da xəstəliyin ağırlaşmasına təsir edən amil kimi göstərilir.
Açar sözlər: Konqo naməlum xəstəlik, Kvanqo yoluxma halları, Panzi xəstəlik səbəbləri, ÜST məlumatı, Konqoda tibbi yardım.
(055) 436-46-45
