Tovuzdakı dəhşətli qəzada həlak olan hərbçilərə şəhid statusu veriləcəkmi?

Dostuna göndər xəbərdən agah olsun:

Agah.az xəbər verir ki, noyabrın 27-də Tovuz rayonunun Ceyrançöl ərazisində baş verən ağır yol qəzasında həlak olan altı nəfərdən beşi Azərbaycan Ordusunun hərbi qulluqçuları olub. Bu hadisə onların şəhid statusu alıb-almayacağı ilə bağlı suallar yaradıb.

Şəhid statusunun verilməsi şərtləri:
Səfərbərlik və Hərbi Xidmətə Çağırış üzrə Dövlət Xidmətindən bildirilib ki, şəhid statusunun verilməsi üçün hərbi hissə tərəfindən təqdim olunan arayış əsas götürülür. Əgər müvafiq arayış təqdim olunarsa, məsələyə baxılacaq və qərar veriləcək.

Müdafiə Nazirliyinin qəza ilə bağlı açıqlamasına görə, hərbçilər xidmətdən kənar vaxtda şəxsi avtomobildə qəzaya uğrayıblar. Bu səbəbdən, şəhid statusunun verilməsi məsələsi qanunvericilikdə nəzərdə tutulan kriteriyalar əsasında müəyyən ediləcək.

Qəza barədə məlumat:
Ağır yol-nəqliyyat hadisəsi “Mercedes” və VAZ markalı avtomobillərin toqquşması nəticəsində baş verib. Hadisə zamanı Azərbaycan Ordusunun beş hərbçisi –

Baş gizir Ruslan Əhliman oğlu Qurbanov,
Baş çavuş Qabil Qaybalı oğlu Alıyev,
Çavuş Bəhlul Aydın oğlu Əliyev,
Çavuş Qələndər Mail oğlu Əhmədov,
Kiçik çavuş Turan Cavad oğlu Mehdiyev həlak olub.

Həlak olan digər şəxs “Mercedes” avtomobilinin sürücüsü E.Həsənov olub. Onun 13 yaşlı oğlu Z.Həsənov isə ağır xəsarətlər alıb və hazırda Gəncə şəhərində müalicə altındadır.

Şəhid anlayışı:
Qeyd edək ki, şəhid statusu qanunvericiliyə əsasən Azərbaycanın azadlığı, suverenliyi və ərazi bütövlüyü uğrunda döyüş tapşırıqlarını yerinə yetirərkən, yaxud döyüş təminatı ilə əlaqədar həlak olan şəxslərə verilir.